Институтот за филозофија при Филозофскиот факултет во Скопје и Филозофското друштво на Македонија петти пат ќе го одбележат Светскиот ден на логиката – 14 Јануари. По тој повод, утре напладне на платформата „Зум“, ќе се одржи онлајн-предавање на тема „Втемелувањето и неговата епистемологија“ (Grounding and its Epistemology), со д-р Дамјан Алексиев, постдокторски истражувач при Виенскиот универзитет.
Светскиот ден на логиката е утврден од УНЕСКО и од Меѓународниот совет за филозофија и хуманистички науки (International Council for Philosophy and Human Sciences) и почнува да се одбележува на 14 јануари 2019 година со идеја подигнување на свесноста за значењето на логиката како една од темелните филозофски дисциплини за развојот на човековите знаења во сите области и за унапредување на културата на дијалогот и заемното разбирање.
– Не случајно е избран 14 јануари за ден кога ќе се прославува логиката. Овој ден е поврзан со двајца големи великани на современата логичка мисла – Алфред Тарски (роден на тој ден 1901 година) и Курт Гедел (умира на тој ден 1978 година) – соопшти Филозофското друштво на Македонија.
Предавачот Дамјан Алексиев е постдокторски истражувач при Виенскиот универзитет, оддел филозофија, каде што првенствено работи на проект за природата на метафизичкото објаснување, финансиран од Австрискиот научен фонд (FWF).
– Освен на тековниот проект, работел и како предавач при Виенскиот универзитет. Докторските и магистерските студии ги има завршено на Централниот европски универзитет (Central European University), а дипломирал на Универзитетот „Св. Кирил и Методиј“ во Скопје. Има објавувано трудови на тема метафизика на свеста и метафизичкото објаснување во Journal of Consciousness Studies, Journal of the American Philosophical Association и Synthese. Најново, заедно со Јаник Капез (Yannic Kappes), Алексиев е коуредник на зборникот Epistemology of Grounding, кој набргу ќе биде објавен од Cambridge University Press – се наведува во соопштението.
Настанот утре со почеток во 12 часот ќе може да се проследи на линкот: следниот линк.
