Нов закон, за нова борба против сивата економија. Пензионерите и студентите добиваат можност легално да работат, со договори, придонеси и јасно утврдени правила. Со ваквото решение илјадници луѓе кои досега работеа „на црно“ ќе влезат во легалниот систем. Целта е – повеќе пријавени работници, повеќе приходи во буџетот, но и фер услови за сите. За пензионерите конкретно, овој закон ќе значи дополнителен приход без да го загубат правото на пензија. Студентите ќе стекнат пак легално работно искуство но и финансиска независност. Од пензионерскиот синдикат ја поздравија оваа измена на законот, и очекуваат голема заинтересираност.
Новото законско решение најмногу ќе важи за угостителството, земјоделството и услужните дејности – области каде што постојано има недостиг од работна сила.
И студентите ќе имаат бенефит од новиот закон за работа.Со тоа тие ќе добиваат пари, работно искуство и легален ангажман.
Со новиот закон за работно ангажирање се очекува околу 17.000 луѓе да влезат во системот и да работат легално. Поради недостиг на работна сила, ќе можат да се ангажираат и вработени и невработени лица, како и луѓе што веќе имаат една работа, но ќе можат дополнително да работат уште една. Според проценките, околу 12.000 луѓе ќе бидат ангажирани во земјоделстовто, а околу 5.000 луѓе во угостителството. Работниците ќе можат легално да работат од 120 до 180 дена годишно.
