Нелегални мигранти и мигрантски кампови нема да има во Македонија. Општинските советници на ВМРО-ДПМНЕ, наредната недела до советите ќе достават на гласање документ, со кој ќе се потврди антиемигрантската политика на државата, кажа премиерот Христијан Мицкоски. Покрај тоа ќе се бара да реагираат и други надлежни, односно да има кривична одговорност за оние кои шират паника во јавноста, на тема нелегални мигранти.
-Политика која што се бори против нелегалната миграција и генерално таков тип на процеси дека нема на територијата на тие општини да се создадат такви мигрантски кампови. И ќе побара од надлежните институции, согласно кривичниот законик да повеат процеси против сите оние кои што сеат страв, паника и покрај јавно изнесените деманти од страна на Владата, тие се кривично одговорни за тоа што го прават, изјави Мицкоски.
СДСМ пак повторно продолжува со истата реторика од минатите денови, дека во Македонија ќе се населувале мигранти.
-Мигранти и пари. Со кредитот од 6 милијарди евра да ги плаќаме мигрантите, да ги храниме и да ја плаќаме изградбата на социјални станови за нив. Во Албанија веќе пристигнаа првите мигранти. Во Косово веќе пристигнуваат депортирани мигранти, а сите знаеме која држава е следна – Македонија, велат од СДСМ.
Мицкоски се прашува како од опозициската партија се излизгале на оваа тема, кога токму тие во 2018-та година на владина седница гласале изградба на мигрантски кампови, за што имало и протести на кои биле и ВМРО-ДПМНЕ. Според Мицкоски СДСМ тогаш обвинувале неговата партија е ксенофобична, за сега нивните обвинувања да се сосем спротивни, но и демантирани од амбасадата на Велика Британија.
-Јас не можам да се изначудам се уште кој ги насанка на оваа тема, бидејќи оваа тема тотално не оди во нивна полза, бидејќи самите тие се тие кои што на владина седница гласале да се градат тие прифатни мигрантски кампови и за што имало протести во минатото, вклучително и ние. Јас тоа го кажав во една изјава, дека во темелните вредности на ВМРО-ДПМНЕ е антиемигрантската политика, изјави Мицкоски.
Изминативе денови, демант за мигрантите стигна од цел државен врв. Министрите Панче Тошпковски, Стефан Андоновски, дури и шефицата на државата Гордана Сиљановска Давкова изјавија дека такво нешто нема да се случи. Претседателката била лично информирана од британскиот амбасадор дека нема да се носат мигранти во Македонија.
Матеја Петровски
