Битката за тронот во СДСМ започна. Филипче, Фрчковски, Пендаровски, Спасовски, Шилегов, па дури и Црвенковски – по најслабиот изборен резултат во историјата, во партијата веќе започна внатрешната рововска битка за тоа кој ќе го преземе раководењето. Последниот во низата, е судирот меѓу идеологот и подржувач на Филипче, екс-министерот Фрчковски, кој отворено го нападна екс-претседателот Пендаровски дека работел против актуелното раководство.
„Ме чуди тоа што мешетари Стево Пендаровски. Нема потреба од тоа. А мешетари – без везе…“ рече Љубомир Фрчкоски, професор и поранешен амбасадор.
Со овие зборови, Фрчкоски директно го отвори прашањето за внатрепартиските игри — но и за улогата на поранешниот претседател Стево Пендаровски, кој, според шпекулациите, води неформална иницијатива за реформи во СДСМ и поширокиот опозициски блок. Пендаровски остро возврати на обвинувањата.
„Во моето 30-годишно бавење со јавни работи никогаш не сум мешетарел, како некои други во чии кариери нема ништо друго освен заткулисни маневри и кафеанско озборување. Изјавата е целосно одлепена од реалноста., напиша Стево Пендаровски, поранешен претседател.
Фрчковски инидиректно посочи дека освен Пендаросвки, на Филипче зад грб му работат и, како што ги нарече, еден поранешен министер и еден поранешен градоначалник, алудирајќи на Оливер Спасовски и Петре Шилегов. Спасовски веднаш по изборите и јавно ислезе со остра критика за поразот и за тоа кој треба да понесе одговорност.
„Резултатот од 126 илјади гласа претставува дно. Се надевам дека тоа ќе биде дното на кое сите ќе застанеме., рече во интеврју пред неколку недели Оливер Спасовски, пратеник и поранешен министер.
Спасовски, кој веќе покажа амбиции за лидерската позиција, вели дека резултатот е аларм кој мора сериозно да се анализира. Според него, дури 60 проценти од граѓаните не излегле да гласаат – јасен сигнал за разочараност не само од СДСМ, туку и од целата политичка сцена.
Но додека сегашните функционери се борат за влијание, во јавноста повторно се појави едно старо, добро познато име – Бранко Црвенковски.
По години отсуство од политиката, поранешниот премиер и партиски лидер е фотографиран неколку пати за само две недели – во друштво со министри, градоначалници и активисти. Случајни средби или координиран сигнал дека повторно ќе игра улога во внатрепартиските процеси?
СДСМ официјално молчи. Венко Филипче тврди дека нема намера да си замине. Но, внатре партијата врие – меѓу стари лојалности и нови амбиции, меѓу паднат морал и желба за контрола.
