„Ако периодот е прекраток за да се цени работата на Филипче во СДСМ, тогаш е прекраток и за да се цени работата на Владата“ – со оваа порака премиерот Христијан Мицкоски му возврати на лидерот на СДСМ, Венко Филипче, кој ја критикува работата на Владата.
Мицкоски испрати директна критика до Филипче, оценувајќи ги неговите изјави како контрадикторни и неубедливи. Истакна дека истиот тој период за кој Филипче тврди дека е прекраток за да се оценува неговото раководење со СДСМ, тој го користи како основа за силни критики кон Владата.
Тој ја оценува Владата за својата работа за година и половина нецели еве во декември ќе биде одкако е избрана и тука дава свој суд, но затоа пак никогаш не дава свој суд за своето претседателствување за истиот период во СДСМ. Ако за тој период вели дека е прекраток за да се цени неговата работа тогаш како наоѓа за сходно да ја цени Владата за истиот период како таа работи. Мислам изјавите се какафонични и една со друга контрадикторни, не мислам дека тоа е правата порака којашто треба СДСМ да ја испраќа но добро, тоа си е нивна работа тие знаат како најдобро како треба“ нагласи Мицкоски.
Од СДСМ во избориот период, но и претходно континуирано ја критукува работата на Владата. Во последно време на тапет им е економската политика која ја води Владата на Мицкоски.. Лидерот на СДСМ Венко Филипче алармираше за, како што ја нарече, „фрапантна буџетска дупка“ во висина од 1,4 милијарди евра до крајот на 2025 година. Бројките ги претстави како аргумент дека економските политики не функционираат.
„Се наоѓаме на само 75 дена пред крајот на 2025 година, а буџетската рамка, која е дефинирана од приходите и расходите во буџетот, покажува загрижувачка слика: Имено до денес, приходите се реализирани со 70,78% или 256,5 милијарди денари. Во исто време, расходите се на ниво од 72,82%, односно речиси 294 милијарди денари. Ова значи дека со вакво темпо, а тоа е за очекување, на крајот на годината ќе недостигаат околу 1,4 милијарди евра за да се покријат сите трошоци. Тоа е фрапантна буџетска дупка“, изјави Венко Филипче, претседател на СДСМ.
Според Филипче, економската состојба е алармантна, капиталните инвестиции слабо реализирани, а реалната економија – како што рече – не мрда од место.
Од друга страна меѓународните финансиски институции проектираат солидни стапки на економски раст. Откако Светска Банка излезе со проекција за зголемување на БДП од 3,1%, Меѓународниот монетарен фонд во последниот извештај наведува дека македонската економија годинава ќе порасне 3,4, а следната 3,2 отсто. Фондот смета дека годината ќе заврши со инфлација од 3,9, додека следната година таа треба да се спушти до нивото од 3%.
