Локацијата на ГОБ ‘8 Септември’ e идеално место за изградба на новиот клинички центар – оценува премиерот Христијан Мицкоски. Сепак им дава предност на експертите да одлучат која е најсоодветна локација за најголем здравствен комплекс во Македонија. Мицкоски го повика и Министерството за здравство заедно со стручен кадар да направат детални анализи за да се финишира проектот .
“Да завршат локалните избори, па да се распише јавен повик за финансиски институции за болниците и клиничките болници поврзани со договорот со Велика Британија.Тоа да заживее па потоа следно е нов голем Клинички центар.Мене оваа локација тука ми делува како одлична можност има три булевари, гасна поврзаност собраќајна поврзаност и ајде да видиме да оставиме експертите да си го кажат своето мислење” вели премиерот Христијан Мицкоски.
Главен фокус на Владата во моментов е реконструкција и изградба на здравствените установи во Штип, Кичево и Тетово – проекти кои се дел од договорот со Обединетото Кралство.
Изминатите 10-тина години постоеа повеќе идеи за локации за нов Клинички – во близина на Бардовци, на излезот од Скопје во Ѓорче Петров или на просторот на касарната „Илинден“ но ништо од тоа не стана реалност.
За 8 години, се сменија седум министри за здравство, имаше шест локации во игра и 6 фирми изведувачи, но наместо нов Клинички центар, претходната Влада ја остави Македонија со обврска за да плаќа пенали за она што требаше само да го спроведе.
Засега од сите најави и ветувања резултатот е еден – 8.5 милиони евра кои треба да и се платат на италјанската компанија зашто екс министерот за здравство Венко Филипче го раскина договорот потпишан од неговиот претходник Никола Тодоров.
Од 2009 досега на сите министри за здравство приоритет им беше нов клинички комплекс, но никој не удри темели. Додека граѓаните го чекаат тој момент, во поголем број клиники имаше и има реновирање за да можат да даваат соодветни здравствени услуги.
