Чаир ќе стане пример за инклузија, еднаквост и почит за секој граѓанин, рече денеска на прес-конференција, кандидатот на ВРЕДИ за градоначалник на оваа општина, Изет Меџити.
Тој појасни дека во рамки на денешниот настан, се зборува за еднаквост, можности и достоинство, за правото секој граѓанин на Чаир да го има своето место во работата, во институциите, во јавниот живот и на секој чекор од секојдневието. Притоа, додаде дека во нивната програма, грижата и вклученоста на лицата со попреченост е една од главните столбови.
– Во соработка со организациите што работат во оваа насока, ќе изградиме долгорочни политики за пристап до образование, здравствени услуги, транспорт и јавни простори. Ќе создадеме посебни програми за нивно вработување и обука во јавниот сектор и во локалните институции. Ќе ги поддржиме микро – бизнисите, социјалните претпријатија и заедничките иницијативи, затоа што економската независност е темелот на човековото достоинство, порача Меџити.
Тој подвлече дека оваа заложба започнува од него лично, од неговиот кабинет.
– Сакам да ја споделам со вас веста дека Ќамуран Исмаили, извонреден човек и професионалец, ќе биде дел од мојот кабинет како советник. Ќамуран нема да биде дел од мојот кабинет само симболично, туку за да има реално влијание. Неговиот глас е гласот на една заедница која заслужува да биде слушната. Неговото искуство е мост меѓу институциите и граѓаните кои често се чувствуваат заборавени. Почнувајќи од мојот кабинет, ние оваа заложба ја претвораме во реалност, истакна Меџити.
Зашто, како што нагласи, вклучувањето на секој човек не е привилегија, тоа е право.
-Чаир ќе биде пример за општина што не дели туку обединува, што не исклучува туку овозможува, што не зборува за луѓето – туку ги слуша и работи заедно со нив, подвлече Меџити на денешната прес-конференција.
