Кандидатот за градоначалник на Илинден, Александар Георгиевски, истакна дека програмата за следните 4 години се темели на развој, просперитет, изградба на модерна инфраструктура, образование, водоводна и канализациска мрежа, и други столбови кои тој ги ветува пред граѓаните.
Георгиевски даде мал осврт на она што е сработено изминативе 4 години во општина Илинден.
„Во делот на инфраструктурата изградивме и реконструиравме над 80 патишта. Во месноста Јака, изградивме улици којашто беше запоставена, изградени се улиците 101, 109, 120, 119. Во делот на патната инфраструктура комплетно е реконструиран патот од Миладиновци до Бујковци во должина од 1500 метри, патниот правец од Бујковци до Мршевци во должина од 1100 метри, патот кон Ајватовци или улицата 36 во должина од 700 метри е комплетно реконструирана, улицата 8 е комплетно реконструирана со нови тротоари од над 1000 метри. Комплетно е реконструирана со нови пешачки патеки улицата 532, каде што реконструиравме и водоводната линија, којашто беше запоставена години и години, и таму имаше секојдневни дефекти. Ова е дел само, ќе немаме време за сите проекти“, истакна Георгиевски во одговор на неговиот против кандидат.
Георгиевски додаде и некои други успеси со коишто општината се развива изминатите 4 години.
„Комплетно проектирање на фекална канализација во месноста Плац, од неколку километри, комплетно проектирање во делот на Кадино, каде што нема фекална канализација, двата сегмента се завршени, почнуваме со третиот. Во делот на спортот, направивме спортско рекреативен центар, со атлетска патека, со тартан подлога, со трибина, ги реконструиравме сите спортски терени во сите населени места, теретана на отворено во Марино, во делот на здравствената заштита, комплетно нов здравствен дом“, порача тој.
Во делот на животната средина, Георгиевски се пофали дека Илинден е една од најчистите општини во околината на градот, како и со чистење на 28 диви депонии.
„Сите оние коишто транзитираат низ општината, можат да кажат дека Илинден е неколку скалила почиста од другите. Во делот на депониите, исчистивме 28 диви депонии, имаме слики за тоа каде биле и како сме ги исчистиле. Во 2025 година имаме транспортирано 5,5 илјади тони кон Дрисла, а до 2021 година, 3296. Тоа е зголемување за 80%, не пораснала општината. Претходно беше носен во овие диви депонии, кои сега се исчистени. Исто така, имаме и 0 денари долг кон Дрисла“, заклучи Георгиевски.
