Градоначалникот на Тетово и кандидат за нов мандат, Билал Касами, денеска на плоштадот на градот ги презентираше главните точки на платформата за периодот 2025-2029 година, ставајќи акцент на младите и нивниот развој во Тетово.
Тој посочи дека со оглед дека Тетово има многубројни млади лица, потребно е да се поттикнат „како главни двигатели на општествените движења“.
-Затоа во нашата програма, 2025-2029 година, имаме предвидено неколку точки кои се директно поврзани со младината, почнувајќи од интеретнички активности и проекти во образованието и едукацијата. Ангажирање во делот на елиминирање на јазикот на омразата затоа што цениме дека во едно мултиетничко општество мора да работиме заедно и сплотени. Организирање заеднички културни и спортски активности, промовирање на културната соработка, завршување на стадионот, градскиот стадион, како и други спортски терени, терени за атлетика, ставање во функција на спортската сала, посочи Касами.
Понатаму во Програмата 2025-2029 се предвидени активности и со државен и меѓународен карактер.
-Организирање на спортски активности – државни и меѓународни, организирање на разни културни манифестации, исто така државни и меѓународни, поддршка на здружението на школските спортови, како и институционализација на младинскиот центар со понатамошна поддршка на истите се со цел сите овие програми да можат да придонесат за нашата младина да биде двигател на нашите општествени движења во Тетово, истакна Касами.
