Со поголема соработка до раст на трговската размена од 20% меѓу Македонија и Обединетите Арапски Емирати. Премиерот Мицкоски оствари средба со директорот на Стопанската Комора на Дубаи на која му ги презентираше можностите за инвестирање во земјава. Според него, добра основа за вложување е стабилната економија со континуиран раст од над 3% во изминатите четири квартали, а добри показатели се и забрзување на градeжништвото, раст на туризмот и земјоделскиот сектор. Мицкоски посочи дека земјава бележи високи износи на вложувања од страна на странските инвеститори, реализира високо ниво на капитални инвестиции, а земјата има инфлација која треба да се стабилизира на 4% годинава, со обврска да ја намали наредните години.
Директорот на Стопанска комора на Дубаи, Мохамед Али Рашед Лута, пак, посочи дека компаниите од Дубаи се најмногу заинтересирани за соработка во области како трговијата, одржливоста и секторите за дигитална економија. Рашед Лута ги повика македонските компании да го искористат Дубаи за да го зголемат своето присуство на глобалниот пазар. Тој смета дека на овој начин, тие можат логистички за го зголемат учеството и на африканскиот континент.
Трговската размена меѓу Македонија и Обединетите Арапски Емирати во последните 5 години изнесува 495 милиони долари. Средбата во Владата меѓу македонските стопански комори, комората на Дубаи и владини претставници доаѓа пет месеци откако во април широка македонска делегација предводена од премиерот Мицкоски беше во посета на Обединетите Арапски Емирати. Тогаш пред бизнисмените во Дубаи и Абу Даби се презентираа можностите за инвестирање во Македонија, започнатите инфраструктурни проекти, проекти од областа на транспортот, енергетиката, туризмот.
