Преку владината мерка за зелени инвестиции досега се отворени речиси 400 нови работни места, објави министерот за економија и труд Бесар Дурмиши при денешната посета на скопскиот ресторан „Ксантика“, еден од успешните примери за зелена транзиција во приватниот сектор.
„Вкупно 228 компании досега инвестираа во зелени решенија – од фотонапонски панели, преку мерки за енергетска ефикасност, до модерна, еколошки прифатлива опрема. Компаниите вложија над 200 милиони денари сопствени средства, што го надминува износот на државната поддршка“, изјави Дурмиши, нагласувајќи дека политиката на Владата служи како катализатор за приватни вложувања и одржлив економски развој.
Финансиската поддршка за отворање ново зелено работно место е зголемена од 205.000 денари во 2022 година на 250.000 денари во 2024, а вкупниот буџет на мерката веќе достигна 93 милиони денари, односно приближно 1,5 милион евра.
За 2025 година, ресорното министерство најавува амбициозна цел: поддршка за најмалку 200 нови работни места во до 200 компании, со можност за финансирање до 750.000 денари по компанија. Дополнително, ќе се понудат обуки и советодавни услуги за унапредување на енергетската ефикасност, со фокус на малите и средни претпријатија.
