На маргините на Бледскиот стратешки форум, министерот за надворешни работи и надворешна трговија, Тимчо Муцунски, денеска оствари одделни средби со министерот за надворешни работи на Литванија, Кестутис Будрис, министерот за надворешни работи на Арапската Република Египет, Бадр Абделати, како и со заменик-премиерот и министер за надворешни работи и иселеници на Хашемитското Кралство Јордан, Ајман Ал-Сафади, соопшти Министерството за надворешни работи и надворешна трговија.
На средбата со литванскиот министер, Муцунски изрази задоволство што годинава двете пријателски земји одбележуваат 30 години од воспоставувањето на дипломатски односи и продолжуваат да градат партнерски релации и активен политички дијалог, споделувајќи заеднички стратешки интереси за траен мир, стабилност и просперитет. Тој нагласи дека Литванија е важен сојузник во рамките на НАТО и значаен поддржувач на евроинтегративниот процес на нашата држава.
Министерот Муцунски изразил благодарност за доследната и принципиелна поддршка на Литванија за македонската интеграција во ЕУ и за нејзината стратешка визија во однос на проширувањето на Унијата и европската иднина на земјите од Западен Балкан. Особено беше потенцирана литванската експертска и техничка помош во исполнувањето на европските критериуми.
-Двајцата министри ја потврдија посветеноста за натамошно унапредување и продлабочување на севкупните билатерални односи и соработка, базирани на длабоко пријателство и споделени вредности, се наведува во соопштението.
На средбите со министрите на Египет и Јордан беше нагласена заедничката заложба за интензивирање на билатералните односи, пред сè на политичко ниво, но и во делот на економијата, трговијата, културата и образованието.
