Денеска во Охрид, министерот за внатрешни работи Панче Тошковски оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредување на меѓусебната соработка и продлабочување на одличните пријателски врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници.
Словенечкиот министер за внатрешни работи, Боштјан Поклукар, го потенцираше огромното пријателство и соработка меѓу нашите народи и држави, кое се пренесува и на министерствата за внатрешни работи, и истакна дека и во иднина Македонија може да смета на нивната целосна поддршка – како во искуство и знаење, така и во конкретни проекти и ситуации – со цел придонес кон поголема безбедност на регионот, нашите држави и нашиот народ.
