Поранешниот министер за земјоделство и пратеник од СДСМ, Љупчо Николовски, во соопштение на партијата остро ги критикуваше политиките на актуелната влада предводена од ДПМНЕ, обвинувајќи дека се загрозува иднината на земјоделците. Тој посочи на укинување на авансната исплата на субвенциите, намалување на буџетот за рурален развој и рекордно ниски откупни цени на земјоделските производи, меѓу кои оризот и пченицата. Николовски оцени дека со актуелното раководство ИПАРД програмата е „на колена“ и дека лозарите се оставени без гарантирани откупни цени.
На ваквите обвинувања реагираше актуелниот министер за земјоделство, шумарство и водостопанство, Цветан Трипуновски, кој на Фејсбук порача дека Николовски најпрво треба да одговори за „коруптивните договори“ од времето на СДСМ и за истрагите кои, како што тврди, се „заглавени“ кај главниот обвинител Коцевски.
Целиот пост може да го погледнете на следниот линк:
Трипуновски посочи дека за разлика од минатото, сега се исплатени сите заостанати субвенции, земјоделското земјиште се доделува на вистинските земјоделци, а не на партиски блиски фирми, и дека откупот на сите култури е обезбеден – без да има производи што скапуваат на нивите.
„Откупните цени се на историски максимум, се инвестира во системи за наводнување, производството и извозот растат, а земјоделците имаат предвидливост и партнер во Министерството“, нагласи Трипуновски.
Министерот додаде дека ваквите резултати се плод на политики кои им даваат можност на земјоделците слободно да планираат на среден и долг рок, а не на, како што рече, „манипулации и бизнис интереси на неколку фирми блиски до СДСМ“.
