Филмскиот фестивал „Преку езерото“ во Дојран вечерва ќе го добие својот лауреат. Актерот Лазар Ристовски ќе ја добие наградата „Мето Јовановски“.
Лауреатот Лазар Ристовски својата петдецениска кариера ја гради во Србија, а му припаѓа на Балканот. Досега се појавил во околу 70 улоги, а потпишан е како продуцент на над 20 филмови.
На филмското платно во амфитеатарот во Дојран ќе биде прикажан негов омаж, а по доделувањето на наградата, публиката ќе ужива во филмот „Дневникот на машиновозачот“, во кој главна улога игра токму Лазар Ристовски. Потоа ќе следува и разговор со Лазар Ристовски за неговата кариера, за актерството, за животот посветен на уметноста на филмот.
Филмскиот фестивал, кој започна синоќа и ќе трае до 12 август, се одржува по четврти пат и ќе изобилува со проекции на македонски, балкански и медитерански филмови.
