Министерството за одбрана и Армијата на Македонија денеска ја одбележуваат 24-годишнината од загинувањето на армиските припадници кај месноста Карпалак. Официјалното одбележување започна вчера, со положување цвеќе пред спомен-обележјето во прилепската касарна „Мирче Ацев“.
На 8 август 2001 година, конвојот на АРМ беше нападнат кај месноста Карпалак на патот Скопје – Тетово, кога беа убиени 10 воени резервисти од прилепската касарна: Сашо Китаноски, Нане Наумоски, Бранко Секулоски, Марко Деспотоски, Ердован Шабраноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски.
Централното одбележување на настанот е пред спомен-комплексот „Карпалак“ во центарот на Прилеп.
„Нивната борба не беше само во името на денешниот ден, туку за иднината на сите нас. За слободата која ја живееме, за Македонија каква што ја сакаме и каква што ќе продолжи да биде, благодарение на нивната жртва. Да не се заборави, не само на деновите кога се бореле, туку и на вредностите што ги оставија зад себе: храброст и одлучност да се зачува Македонија. Нивната храброст и саможртва нема да бидат заборавени, ќе живеат во нашите срца засекогаш. Нека им е вечна слава“, порача министерот за одбрана Владо Мисајловски.
