Просечната плата во Македонија достигна 45 800 денари. Иако ова е тренд на пораст и тоа од 11 отсто во однос на мај минатата година, сепак не е доволно за македонските работници. Со ова се согласува и премиерот Христијан Мицкоски кој вели дека фокусот на владата е во насока на креирање политики кои ќе донесат повисоки плати во државата.
Изминатиот период владата ги покачи платите во здравството, образованието и во полицијата. Растот на просекот според статистика пред се, се должи на растот на платата во финансиските дејности, трговијата на мало и големо, во образование и кај оние што се занимаваат со поправки на моторни возила и мотоцикли. Според Мицкоски, бројките јасно го демантираат наративот на опозицијата дека платите во Македонија стагнираат и нема раст.
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн, рече Мицкоски.
Од друга страна синдикатот сеуште бара раст на минималецот на 500 евра и раст на сите останати плати за 6 илјади денари. По неколку месечна пауза на иста маса ќе седнат владата, синдикатите и работодавачите откако се утврди репрезентативноста на синдикатите, а од ССМ најавија дека ќе бараат да се дискутира за раст на минилецот.
Владата во неколку наврати кажа дека нема против раст на минималецот доколку за тоа се договорат работниците и работодавачите. Според законот, минималната плата достигна скоро 400 евра во март годинава.
На седницата на ЕСС според најавите ќе се разговора и за предлогот за пет потрошувачки кошнички кои според премиерот треба да ја дадат сликата за реалната потреба на граѓаните.
