Меџити против Османи – битка на тешкаши во Чаир. Откако екс-министерот за надворешни работи и еден од повисоките функционери на ДУИ ја официјализираше својата кандидатура за оваа општина, се поголеми се шансите таму како противкандидат од „Влен“ да му се спротивстави Изет Меџити, еден од лидерите на оваа коалиција.
Имено, актуелниот вицепремиер Меџити не ја исклучува можноста тој лично да му застане на пат на Османи, но вели дека прво ќе почекаат што велат анкетите за тоа кој каде да оди, така што во игра останува и актуелниот градоначалник Висар Ганиу. „Ако ДУИ оди со потпретседател и со членови кои биле кандидат за претседател на државата, министер за надворешни работи – и ние ќе одговориме со иста ‘артилерија’“, изјави Меџити.
Во исто време, тој ја обвини актуелната градоначалничка на Скопје, Арсовска, дека работи во полза на Османи. „Знам зошто ДУИ не реагираат за дивоградбите, бидејќи и посочениот кандидат и екс министер Бујар Османи живее во дивоградба и затоа не може тој да зборува за дивоградбите, нема морална можност за тоа, туку се кријат зад Данела, да ја искористат во текот на кампањата“, посочи Меџити.
Интересно е што, за разлика од сите досегашни избори, главната битка меѓу двата главни ривали во албанскиот политички блок не е за Тетово или Гостивар, туку за скопски Чаир.
