Стравичната сообраќајка во која згасна животот на 16-годишно момче кое управувало мопед, го вклучи алармот. Во само неколку месеци, ова е втора жртва на регионалниот пат Охрид – Св. Наум, на истиот потег кај населбата Рача. Моторите се посебно привлечни за младата популација, а ваквите трагедии само говорат дека затаивме и како родители и како просветни работници. Децата треба да се воспитуваат пред да им се купи мопед, децидни се експертите. Тие упатуваат и на поголема институционална будност и делување и на полиција, како и посериозен пристап на центрите за полагање на возачки испит.
„Префрлувањето од една дестинација на друга со моторцикл треба да се всади дека е тоа потреба, можност, избор, а не можност да се манифестира нешто што не треба и што го доведува во опасност пред сè тој што вози, но и другите учесници во самиот сообраќај. Многу е важно тој воспитен дел и институции, но и дома и во семејствата, бидејќи стварно е многу тешко и непревентивно како заедница да губиме млад живот како учество во сообраќајот“ – вели Љупчо Милкоски, аналитичар за безбедносни појави.
А податоците од полицијата се поразителни и повеќе од загрижувачки. При контролите спроведени од март до јуни, 231 моторциклист не користел заштитна кацига, 42 возеле без возачка дозвола, еден управувал мотор без продолжена важност на возачката дозвола, а еден моторциклист возел пијан. Сите се санкционирани.
„Ова е уште еден аларм за сите нас дека е потребно што е можно повеќе совесно и внимателно управување со патничките и други моторни возила, со моторциклите. Тоа значи користење на заштитна опрема моторциклистите и велосипедистите, носење заштитна кацига – шлем, не користење мобилни телефони при управувањето со моторните возила и доследно почитување на сообраќајните правила и прописи“ – вели Стефан Димоски, портпарол на СВР.
Во ужасната сообраќајка која се случи нешто пред 2 часот по полноќ, 16-годишникот излетал од коловозот и удрил во метален столб, при што се здобил со тешки повреди на виталните делови од мозокот. Со моторот се превезувало уште едно момче на иста возраст.
„Едниот пациент кој беше примен кај нас беше со тешки телесни повреди, политрауматизиран, со повреди на повеќе системи. Беше згрижен во првите 10–12 часа, потоа се установи уште една повреда на хепар, заради која беше префрлен на Клинички центар во Скопје, и имам информација дека во меѓувреме веднаш после префрлањето е санирана повредата и пациентот се опоравува“ – вели д-р Харалампие Шокароски, директор на „Св. Еразмо“.
Охриѓани се вознемирени, тагата кај секој е подеднакво голема. Од него се простуваат соучениците, другарите, клубот во кој што тренираше како фудбалски талент. Инаку, со почетокот на летото се зголемува бројот на сообраќајки, а битката за спас на сечиј живот кој настрадал ја водат во Специјалната болница „Свети Еразмо“, каде обемот на работа е петкратно зголемен. Полицијата најавува интензивни сообраќајни контроли и ригорозни казни.
