Со предлог Законот за внатрешни работи не нудиме козметички измени ниту пак крпење на дупки, туку имаме единствена цел да изградиме функционален, ефикасен и фер систем. Со овој закон ги поставуваме новите темели на кадровската и организациска структура на Министерството, истакна министерот за внатрешни работи Панче Тошковски.
Тој денеска пред пратениците од Комисијата за одбрана и безбедност образложувајќи го Предлог законот за внатрешни работи порача дека новите решенија се фокусирани на поедноставување на квалификацијата на работните места.
-Го надминуваме деценискиот хаос, наместо седум категории и 38 нивоа и 28 видови на работни места, новиот ЗВР нуди две категории, раководни и извршителски, три јасно дефинирани нивоа и 10 видови работни места. Законски предвидуваме испити и за унапредување со елиминаторен карактер за клучните позиции, како што ќе бидат главен инспектор и раководни работни места. Задолжителни интервјуа како интерни огласи, обука како предуслов за сите кои за прв пат добиваат раководна позиција. Прецизни правила за привремено распоредување и унапредување под строго определени услови, истакна Тошковски.
Тој информираше дека со предложеното законско решение ќе се воведе професионален тест за интегритет кој ќе биде функционален.
Пратеникот од СДСМ Оливер Спасовски истакна дека нов закон за внатрешни работи е потребен и дека тој е менлива работа но, како што рече, во предложениот има крупни работи кои според него се од политичка примена и ќе придонесе за поинаков начин на менување на структурата на МВР.
Според него класификацијата на работните места каде се прават две работни места е уназадување на претходните законски решенија бидејќи на овој начин ќе се наруши системот на кариера.
-Со тоа ќе дојде до намалување на пониско ниво на работните места кои се оперативни и потребни, но ќе дојде и до сериозни и комплексни промени во кариерниот развој на вработените, поточно ќе има уназадување во кариерата без основ, разлика што овој закон е спротивен на уставните начела и европските вредности, нагласи Спасовски.
Тој забележа и тоа дека дадените критериуми предвидени за нивоата на работни места немаат дефинирано како ќе се применат при систематизирањето на работните места.
Пред пратениците на Комисијата за одбрана и безбедност, министерот Тошковски ги образложи и измените и дополнувањата на законот за полиција со кој се менува делот за условите кои треба да ги исполнува директорот на Бирото за јавна безбедност, каде како услов се наведува дека треба да има стекнато најмалку 300 кредити според ЕКТС или завршен најмалку VII/2 степен на образование од областа на општествените науки, да има најмалку 12 години работно искуство во полициските работи, од кои најмалку пет години на раководни или советодавни позиции.
Новина е и тоа што директорот ќе има заменик, кој на предлог на министерот го именува и разрешува Владата, за време од четири години.
Министерот најави и отворање на две полициски станици – Сарај и Илинден, а постојните полициски станици Бит Пазар и Чаир ќе се преименуваат, односно Битпазар ќе биде ПС Чаир, а сегашната Чаир која е во Бутел ќе биде ПС Бутел.
Пратеникот Оливер Спасовски во дискусија за предлог измените за законот за полиција рече дека е нелогично бришењето на условите на работно искуство и условите на раководна позиција за началник на Сектор за внатрешни работи со тоа што, како што рече, секој кој ќе положи приправнички испит ќе може да биде началник на сектор што, според него, нема да се зголеми професионалноста и подобрувањето на работите.
Законот за внатрешни работи и измените и дополнувањата на Законот за полиција во прво читање беа усвоени и дадени на натамошно читање.
