А денеска почнува дводневниот НАТО самит во Хаг. Од Бугарија сè уште нема никаков одговор дали на маргините на самитот ќе се случи средбата меѓу претседателката на државата Сиљановска-Давкова и бугарскиот премиер Росен Желјазков. Од Кабинетот на Сиљановска денеска известија дека на маргините ќе се сретне со некои од претседателите на државите членки на НАТО, без прецизно наведување со кого.
Средбата треба да се случи во сенка на дебатата во Хаг каде лидерите на Алијансата, вклучително и американскиот претседател Доналд Трамп, ќе разговараат за зголемување на трошоците на одбраната и безбедноста на членките. Претседателката Гордана Сиљановска-Давкова претходно изјави дека, иако е правило да има средба со својот хомолог, не е проблем да разговара и со бугарскиот премиер Росен Желјазков, со оглед дека е потврдено оти нејзиниот бугарски колега, претседателот Румен Радев, не доаѓа во Хаг — во насока на деблокирање на нашите евроинтеграции.
