Женка од загрозениот вид сијаманг почина неодамна во Скопската Зоолошка градина. Од ЗОО потврдуваат дека е извршена обдукција од страна на Факултетот за ветеринарна медицина, а официјални информации ќе бидат соопштени штом стигнат резултатите.
Зоолошката ги демантира шпекулациите дека мајмунката била бремена, нагласувајќи дека животните добиваат редовен ветеринарен надзор и грижа. „Не секогаш е можно да се спаси животот, и покрај сите преземени мерки“, велат од установата.
Но, случајот предизвика бурни реакции. Советникот во Град Скопје, Стефан Кирков, обвини за негрижа и прикривање на информации, тврдејќи дека починатата женка била бремена и тајно носена во приватни ординации. „Скопје ЗОО е претворена во куќа на стравот“, напиша Кирков, повикувајќи на новинарска истрага и одговорност од раководството и од градоначалничката Данела Арсовска, која, според него, јавно ги брани одговорните.
