Нова телефонска линија за повредените во трагедијата во Кочани. На телефонскиот број 070 355 526, повредените и нивните семејства ќе можат во секое време, да ги упатат своите барања и потреби. Линијата ќе профункционира во понеделник, а со неа ќе управува Канцеларијата на претседателот на Владата. Целта е кога ќе се примат барањата, веднаш да се проследат до надлежните институции за нивно решавање во најкус можен рок.
Портпаролот на Владата Марија Митева вели дека оваа иницијатива е резултат на директната комуникација на терен на работната група за евалуација на состојбата на повредените. Таа вели дека поддршката не треба да биде еднократна, туку континуирана и ова Владата го прави за лицата кои се лекуваат во кочанската болница и за нивните семества, односно за сите кои се соочуваат со последици што бараат трпеливост, сила, но пред се системска поддршка.
За да не биде целата помош централизирана, Владата размислува и да отвори канцеларија во Кочани и да ги подобри условите во локалната болница, за повредените да не мораат за одредени лекарски интервенции да патуваат во Скопје, бидејќи не треба да се изложуваат директно на сонце. Во пожарот во кочанската дискотека „Пулс“ на 16-ти март загинаа 63 лица, а над 200 беа повредени.
