Раст од 3% оваа и 3.1% следната година. Европската комисија проектира дека македонската економија ќе биде поттикната од инвестициите и од јавната потрошувачка. Во извештајот се нотира и дека невработеноста ќе продолжи да се намалува, а инфлацијата ќе се движи околу 2% во следните две години.
„Се предвидува дека растот постепено ќе се забрзува, поддржан од голем проект за јавна инфраструктура и од потрошувачката на домаќинствата, која има корист од силниот раст на платите и намалувањето на инфлацијата. Фискалниот дефицит се покажа помал во 2024 година од ревидираната цел на владата, делумно бидејќи капиталните расходи повторно беа недоволно имплементирани“ стои во извештајот на Европската комисија во делот посветен на Македонија.
Во извештајот пишува и дека ризиците за изгледите за раст произлегуваат од послабата домашна побарувачка од очекуваната.
Најголем раст на економијата во 2025-та година во Европа треба да има Малта, 4.1%, а најнизок Австрија со -0.3% и Германија со 0%. Растот на ниво на цела Европска Унија треба да биде 1.1%.
