Претседателот на Стопанската комора на Косово и претседател на Коморискиот ивестициски форум (КИФ), Лулзим Рафуна и претседателот на Стопанската комора и потпретседател на КИФ Бранко Азески денеска во Скопје разговараа за проблемите со подолгото задржување на македонски камиони кои транспортираат прехранбени производи на територијата на Косово, под изговор дека задржувањето е поради чекање резултати од лабораториски анализи.
На заедничката средба констатираа дека трговијата меѓу двете земји како докажани трговски партнери, мора да се одвива непрекинато. Побараа да се надминат проблемите преку забрзување на протокот на камионите и наместо на меѓуграничниот простор тие да се насочат согласно законската регулатива во магацините и таму да се чека исходот од лабораториските анализи.
Оценија дека треба да се примени принципот на проценка на ризик при спроведување на физичка контрола на граничниот премин, а не да се врши контрола на секоја пратка поединечно, како и да се иницира двете влади преку надлежните институции (Агенциите за храна и ветеринарство), да работат на усогласување на сертификатите и нивно заемно признавање зашто е потребно усогласување со европската регулатива.
-Заеднички заклучок од состанокот на Рафуна и Азески, е дека мора да се применат конкретни активности во согласност со политиките на Европската Унија и меѓународните договори, затоа што само така и двете држави ќе покажат дека се сериозни во однос на патот кон кој се насочени, а тоа е членството во ЕУ, соопштија од Стопанската комора.
На состанокот, се вели во соопштението, двајцата претседатели на коморите разговараа и за протокот на стоки и услуги кои со изградба на автопатната инфраструктура на Косово добија на интензитет и побрза динамика, а со зголемената функционалност на граничните премини на двете страни се поттикнува зголемена ефективност.
-Останува да се заокружи уште патната инфраструктура на територијата на нашата држава, каде поради се уште активните градежни работи се создаваат долги колони возила што го забавува протокот, велат од Стопанската комора.
