Како дел од делегацијата предводена од претседателот на ВМРО-ДПМНЕ, Христијан Мицкоски, веќе два дена учествуваме на Конгресот на Европската народна партија во Валенсија. Европската народна партија во моментов претставува најмоќното и највлијателното политичко семејство во Европа, соопшти потпретседателот на ВМРО-ДПМНЕ, Тимчо Муцунски.
„Претседателот Мицкоски ќе има свое обраќање на пленарната сесија, а предвидени се и бројни билатерални средби.
Ќе се сретнеме со новиот канцелар на Австрија, г. Стокер, со лидерот на албанската опозиција, г. Бериша, со лидерот на СНС, г. Вучевиќ, како и со претседателот на Комисијата за надворешна политика на Европскиот парламент, г. Мекалистер.
Работиме на афирмација на нашите национални позиции, пред сè во контекст на европската интеграција. Забрзаната интеграција на Западниот Балкан во ЕУ е од суштинско значење, и за регионот и за самата Европска Унија“, истакна Муцунски.
„Нашите македонски национални интереси ќе бидат заштитени, нашите позиции јасно претставени, и ќе бидеме рамноправен учесник во семејството на највлијателната политичка сила во Европа“, додаде тој.
