Денес, генералниот директор на ТАВ Македонија, Неџат Курт, и Андраш Радо, раководител за комуникации во „Виз Ер“, ќе одржат прес-конференција за новите авиолинии кои ќе бидат воведени од Меѓународниот аеродром Скопје. Тие ќе информираат за новата релација Скопје – Лион, како и за повторното воведување на летот за Барселона, кој ќе стартува на 3 мај.
Според најавите, летовите за Барселона ќе бидат двапати неделно (секој вторник и сабота), додека за Лион три пати неделно (вторник, четврток и сабота). Овие авиолинии ќе се реализираат со субвенции од Владата на Република Северна Македонија.
Покрај тоа, од 29 септември 2025 година, „Виз Ер“ ќе ја воведе и авиолинијата Скопје – Штутгарт, која ќе опслужува летови три пати неделно (понеделник, среда и петок). Од март оваа година се реализира и линијата Охрид – Истанбул.
Според последните најави, ќе се повтори летот на релацијата Скопје – Дубаи, кој беше одложен за наесен по барање на „Флајдубаи“.
Премиерот Христијан Мицкоски спомена дека се водат преговори за нова авиолинија која ќе го поврзе Абу Даби со Охрид, а вицепремиерот Александар Николоски потврди дека се разгледуваат можности за воведување на авиолинија Скопје – Прага.
