Денес, во Уставниот суд на Република Северна Македонија во Скопје, ќе се одржи тркалезна маса на тема „Дали ни е потребен Закон за Уставниот суд?“. Целта на настанот е да се отвори јавна дебата за потребата од донесување на посебен закон кој ќе го регулира работењето на Уставниот суд, преку дијалог помеѓу претставниците на институциите, правната заедница и граѓанскиот сектор.
Настанот ќе започне со воведни обраќања од високите официјални личности: претседателката на Република Северна Македонија, Гордана Силјановска-Давкова, претседателот на Уставниот суд, Дарко Костадиновски, амбасадорите на Европската Унија, Германија и САД – Михалис Рокас, Петра Дрекслер и Анџела П. Агелер.
Потоа, ќе следи презентација на резултатите од анализата за потребата од донесување на Закон за Уставниот суд, изработена како дел од ЕУ-финансиран проект. Презентацијата ќе ја водат тим лидерот Карстен Манке и вишите правни експерти Мартин Сопронов и Маргарита Цаца Николовска.
Ставовите на судиите од Уставниот суд ќе ги презентираат Ана Павловска-Данева и Татјана Васиќ-Бозаџиева, додека претставници од правната струка ќе ги изнесат своите мислења професорите Тања Каракамишева-Јовановска, Јетон Шасивари, Денис Прешова и Рената Дескоска.
Представниците на граѓанскиот сектор, Дарко Аврамовски од Коалиција „Сите за правично судење“ и Бојан Трпевски од Асоцијација на млади правници на Македонија, ќе споделат свои ставови во рамките на дебатата.
