Одлуката на Обединетите Арапски Емирати (ОАЕ) да овозможат безвизен режим за македонските државјани претставува значаен дипломатски успех и резултат на интензивната и насочена надворешна политика на Владата. Оваа мерка стапува на сила веднаш по официјалната посета на владината делегација на ОАЕ, која се одржа од 14 до 17 април.
Според соопштението од владејачката ВМРО-ДПМНЕ, укинувањето на визите претставува прв конкретен резултат од таа посета и е почеток на процес на продлабочување на односите со еден од најбрзо растечките економски центри во светот.
Со оваа одлука, македонските граѓани добиваат полесен пристап до еден глобален пазар, додека за младите претприемачи, студенти и инвеститори се отвораат нови можности за соработка, едукација и развој надвор од границите на Европа.
„Владата предводена од ВМРО-ДПМНЕ продолжува да ја гради надворешната политика врз принципи на економска соработка, иновации и отвореност кон нови партнери. Безвизното патување е само почеток на еден поширок стратешки дијалог со Обединетите Арапски Емирати,“ се наведува во соопштението на партијата.
ОАЕ, како водечки регионален економски центар со значајно влијание во енергетиката, инфраструктурата и финансиите, претставува клучен партнер во рамките на новата македонска дипломатска ориентација која се фокусира на резултати и практична соработка.
