Министерот за локална самоуправа, Златко Перински, денеска изјави дека е време да се покаже вистинска подготвеност за суштински промени, преку конкретни дела, а не само декларативно.
„Денеска се одржа Советодавниот одбор за проектот Заедници за интегритет, кој се спроведува од Националниот демократски институт со финансиска поддршка од амбасадите на Швајцарија и Шведска. Преку овој проект, заеднички ќе делуваме во борбата против корупцијата,“ изјави Перински.
Тој нагласи дека, иако предизвикот е голем, постои силна волја за промени:
„Свесни сме за тежината на задачата, но уште поважно – подготвени сме активно да работиме на создавање поотчетни локални институции и зголемување на довербата меѓу граѓаните и институциите.“
Како член на Советодавниот одбор, Перински истакна дека е целосно посветен на поддршка на проектот:
„Стојам на располагање за сите активности поврзани со овој проект. Ќе обезбедам поддршка таму каде што е најпотребно – било преку координација, било преку директен дијалог со локалните самоуправи,“ објави тој на својот профил на Фејсбук.
