Вицепремиерот и министер за транспорт Александар Николоски, кој овие два дена е во посета на Обединетото Кралство, има значајни средби на кои се разговара за продлабочување на односите, зголемување на трговската размена и инвестициите, пред се во делот на инфраструктурата.
Тој синоќа оствари работна средба со Тим Рид, извршен директор на Извозно-кредитната агенција на Обединетото Кралство, со кого разговарале за економската соработка меѓу двете земји во делот на реализација на капиталните инвестиции.
Николоски ги истакнал плановите на Владата за развој и модернизација на инфраструктурата со посебен акцент на патната и железничката мрежа.
Работните средби на вицепремиерот Николоски продолжуваат и денеска во Лондон, каде е планирано да се реализираат одвоени средби со Стивен Даути, министер задолжен за Европа, како и со Дејм Карен Пирс, специјален претставник на Обединетото Кралство за Западен Балкан.
Николоски вчера имаше средба и со Герет Томас, министер за економија и извоз во Владата на Обединетото Кралство. Двајцата се согласиле дека постојат добри потенцијали за продлабочување на односите. Николоски очекува извозот кон Велика Британија, како наш втор трговски партнер, да расте и од постојните две и пол да надмине извоз во вредност од три милијарди евра.
