Прво опомени, а потоа казни за трговците кои нема да ги објават јавно цените на производите на нивните интернет страници. Директорот на Државниот пазарен инспекторат, Влатко Стојкоски вели дека ќе направат анализи и до петок ќе имаат сублимат дали и кој ја испочитувал законската обврска или не. Пазарните инспектори се на терен и вршат контроли, односно вршат споредба дали цените на интернет страниците се исти со оние на продажните места. Целта е да се покрие целата територија на Македонија и да се изврши надзор врз работењето на трговците.
„Формирани се 10 тимови на цела територија. Има двајца до тројца во тимот зависно од одлуката на раководителот. Целта е трговците да увидат дека ги контролираме и да ја почитуваат законската обврска. Големите маркети генерално ја имаат исполнето обврската, но треба уште некои работи да ги доуредат. Во овие први неколку дена има некои нејасностии, забелешки и ние дадовме насоки како да постапуваат“ – рече Влатко Стојкоски, директор на Државен пазарен инспекторат.
Од минатиот петок, трговците, односно маркетите, аптеките, салоните за бела техника задолжително мораа на веб страниците да ги објавуваат сите детали околу производите кои ги продаваат. Тоа вклучува не само објава на редовните продажни цени, туку и информирање за разните попусти, промоции и викенд акции. Законската обврска не важи само за микротрговците односно оние кои имаат до 10 вработени. Продавниците ќе мора да ги објавуваат цените на дневна основа, односно секој работен ден до 10 часот.
Од Организацијата на потрошувачи на Македонија им сугерираа на надлежните да се направи, посебен веб сајт каде што на едно место ќе можат да се најдат цените од сите маркети, за полесно да се направи споредба. Надлежните апелираат доколку граѓаните забележат дека на веб страницата не е поставена цена или е поставена, ама не е иста со продажниот објект каде што се купува, да го пријават случајот во Пазарниот Инспекторат. Казните за непочитување на законските обврски изнесуваат од 1.000 до 10.000 евра.
