Претседателот на Движење Беса, Биљал Касами од Тетово, денеска изјави дека коалицијата Вреди е во последна фаза на трансформација во нова политичка партија, а веќе оваа недела ќе бидат именувани 23 претставници кои ќе го сочинуваат заедничкото претседателство.
„За да функционираме како една единица, треба да формираме заеднички орган кој ќе носи одлуки, како и статутарна комисија која ќе ги утврди сите важни прашања – како се избира претседателот, кои ќе бидат раководните структури, и ќе има механизми за контрола и балансирање“ – истакна Касами.
Тој појасни дека првата и најзначајна одлука веќе е донесена – да се формира заедничко претседателство, кое ќе го води процесот кон целосно спојување на коалицијата.
„Според закон, целиот процес ќе заврши со одржување на заеднички конгрес и формално регистрирање во Централниот регистар“ – додаде тој по одржаниот општински настан на плоштадот во Тетово.
Касами нагласи дека коалицијата добила 107.000 гласови на последните избори, што ја претставува основата за легитимитетот на коалицијата и учеството во идната влада. Во исто време, го критикуваше ДУИ.
„Ние како коалиција добивме 107.000 гласови, кои дојдоа од коалицијата на албански политички партии. Се знае дека останатите коалиции беа мултиетнички, а коалицијата на ДУИ не може да се повикува на застапување на правата на Албанците во државата. Сметаме дека овие 107.000 гласови се нашата основа за да ги претставуваме Албанците и другите граѓани во идната влада. Било кој што ќе се отцепи од оваа коалиција, нема да ја има поддршката на овие 107.000 гласови. Тие гласови се нашиот легитимитет за да ги претставуваме Албанците и сите граѓани во Владата“ – заклучи Касами.
