Петровец прераснува во модерна урбана општина.Се гради нова сообраќајница кон индустриската зона, се реконструираат локалните улици, се поставува лед улично осветлување, се градат пешачко-велосипедски патеки, никнуваат нови зелени површини и спортски сали, игралишта, а се градат и модерни живеалишта. Она што е од особена важност за општината е изградбата на нови погони во индустриските зони, кои нудат примамливи плати за граѓаните. Визијата на градоначалникот е од Петровец и Ржаничино да се создадат мали, урбани места.
„Најголемата мултифункционална зона Чојлија целосно е продадена од Општина петровец и таму може да се каже дека е огромно градилиште. Во моментов се градат девет хали на фирми, кои ќе имаат голем број на вработувања. Наредниот период сакам да го сменам ликот на општина Петровец. Веќе Петровец и населеното место Ржаничано не личат на селски населби, туку на урбани средини“, изјави градоначалникот на Петровец, Борче Ристески.
Близу основното училиште „Кочо Рацин“ почнува изградба на нова детска градинка со средства од унгарски кредит, со што ќе се реши долгогодишниот проблем со недостиг на капацитети. Изградени се шест нови станбени згради, а во тек е изградбата на уште три. Поради поволните услови, значително пониските цени на станови и комуналии, расте интересот за живеење во општината.
Огромен е интересот на луѓе кои сакаат да купат станови кои сакаат да купат парцели за градење на куќи. Ние работиме нон стоп да обезбедиме такви површини и имаме такви површини. Станот во Скопје да го купиш е повеќе од 2500 евра за квадрат, за разлика од Петровец каде е 1000, до 1100 евра квадрат. Комуналиите се 50 евра за изградба на зграда, во Скопје се енормно поголеми, затоа и становите во Петровец се поевтини“, изјави градоначалникот на Петровец, Борче Ристески.
Со истите средства од унгарскиот кредит, општината аплицира и за изградба на нов културен дом, патишта во должина од 6.500 метри и канализација во село Огњанци.
