Возачот што со автомобил влечеше коњ низ Скопје е идентификуван – ќе одговара за „мачење на животни“.
Министерството за внатрешни работи соопшти дека, по објавата на видео-снимка на социјалните мрежи, на која се гледа како возач управува патничко возило марка „Голф“ со скопски регистарски таблички, при што за куката на возилото е врзан коњ што се влече низ градското подрачје, веднаш се преземени соодветни мерки од страна на СВР Скопје.
Според соопштението, полициските службеници спровеле активности за утврдување на сторителот на делото и негово документирање, при што станува збор за кривично дело „мачење на животни“, предвидено и казниво по член 233 од Кривичниот законик.
По преземените мерки, лицето што управувало со возилото е идентификувано. Со него е извршен службен разговор, а за случајот е известен и јавен обвинител. Согласно неговите насоки, ќе биде изготвено известување до Основното јавно обвинителство – Скопје, за понатамошно постапување врз основа на собраниот и документиран материјал.
