Во пресрет на 8-ми април – Меѓународниот ден на Ромите, во кабинетот на претседателката Гордана Сиљановска-Давкова се одржа дебата на тема „Предизвиците со интеграцијата на Ромите низ призмата на младите“. Учесници во дебатата беа ученици и студенти, припадници на ромската заедница. Честитајќи им го Меѓународниот ден на Ромите, претседателката Сиљановска-Давкова им порача на младите Роми да бидат горди на својата етничка припадност, со оглед на докажаната креативност, скромност, способност и адаптибилност што ги прави посебни. На дебатата беа истакнати многу предизвици, како проблемот со изучувањето на ромскиот јазик како мајчин јазик и како уставно загарантирано право. Претседателката изрази став дека формирањето на катедра за ромски јазик ќе придонесе за создавање педагошки кадар за ромскиот јазик. Беше нагласена и потребата од основање Ромски културен дом, културно-уметнички и спортски друштва, како и библиотека. Младите Роми посочија на низок квалитет на здравствените услуги што ги добиваат Ромите, со оглед на постојаниот недостаток на медицински кадар во Шуто Оризари.
