Зголемувањето на мартовската плата за 2.500 денари ќе им го подобри животниот стандард на медицинските сестри во јавното здравство. Со овој пораст на нивните примања, просечната плата на медицинските сестри со средно образование е околу 500 евра. Со покачувањето на примањата во ноември, медицинските сестри добија плус 6.200 денари.
Оние медицински сестри со договори на дело се надеваат на распишување нови огласи за вработување во текот на месецов. Проценките се дека во Македонија недостасуваат од 5 до 6 илјади медицински сестри, потребни за работа во клиниките и здравствените домови..
Медицинските сестри беа меѓу првите кои им помогнаа на повредените од трагедијата во Кочани. Голем дел од нив работат прекувремено за да можат да ги опслужат сите пациенти на кои им треба медицинска нега. На Регионалната конференција на медицински сестри на Југоисточна Европа која се одржува денеска во Скопје, присуствуваат и медицинските сестри кои ги лекуваат пациентите пратени во Бугарија, Србија, Австрија.
„Ние важноста на медицинските сестри ја видовме во Ковидот и во вакви ситуации кога ќе настапи кризна состојба. За една мала болница и една сообраќајна несреќа е голема работа, а не па ваква несреќа што се случи со голем број на жртви и многу повредени. Еве видовте дека и во вакви услови, брзо се воспостави заповедна одговорност, ланец, и медицинските сестри, техничарите и лекарите брзо одговараат на такви ситуации и релативно брзо сите се поврзавме и прууживме помош“
„17 деца дојдоа, од кои 4 беа префрлени во Ниш. Добри се, стабилни, не се на респиратор,такашто се надеваме на најдоброто“
„Кај нас имаше тешко повредени. Ние имаме специјализирано одделение за изгореници во болницата Пирогов . Имавме 7 деца пациенти, кои сега се во стабилна состојба“
Поради нивната пожртвувана работа, медицинските сестри кои се грижат за повредените од Кочани, на Регионалната конференција добија и соодветни признанија за нивниот несебичен ангажман.
