По завршувањето на редовниот состанок на кризниот штаб, министерот за здравство, Арбен Таравари, ги информираше медиумите дека моментално 162 лица се хоспитализирани. Од нив, 10 пациенти кои се на лекување во државата денес ќе бидат испишани и пуштени на домашно лекување.
Во Клиничкиот центар се хоспитализирани 25 пациенти, во ГОБ „8 Септември“ има 12 пациенти, во Стара градска болница се 11, а во Клиничка болница Штип е 1 пациент. Во приватните болници се хоспитализирани 9 пациенти.
На лекување надвор од државата се 115 пациенти. Во Србија се 30 пациенти, од кои двајца се екстубирани, во Бугарија се 15 пациенти, тројца се екстубирани и сите се стабилни, додека некои се покритични. Во Грција се хоспитализирани 12 пациенти, двајца се критични, во Турција 6 пациенти се екстубирани. Во Шпанија има 7 пациенти, во Австрија 5, од кои двајца се префрлени на оддел. Во Унгарија се хоспитализирани 6 пациенти, еден има фебрилни симптоми, а другиот кашлица, додека останатите се во стабилна состојба. Во Хрватска има 5 пациенти, од кои еден е интубиран и стабилен, а останатите се во добра состојба. Во Словенија има 4 пациенти, од кои тројца се во посериозна состојба, а во Литванија има 4 пациенти, од кои еден е веќе екстубиран. Во Белгија се хоспитализирани 4 пациенти кои се стабилни, а во Италија 4 пациенти кои се на нозе и може да се враќаат во наредните недели. Во Шведска има 4 пациенти, од кои двајца се во стабилна состојба, а во Полска се двајца пациенти, од кои еден е интубиран.
Министерот информираше дека упатувањата на повредените пациенти во странство се завршени.
„Од овој состанок, веќе имаме најави за враќање на пациенти од одредени држави. Подготвуваме протоколи за нивно враќање и прегледување по пристигнувањето. Пациентите кои се во добра состојба ќе бидат пуштени дома. Следниот предизвик ќе бидат инфекциите, и ќе бидеме максимално внимателни за да превенираме било какви компликации“, рече министерот Таравари.
