Одделенијата за изгореници во соодветните здравствени установи во Солун и Атина продолжуваат да бидат во состојба на зголемена подготвеност, истакна портпаролот на грчката Влада, Павлос Маринакис, на денешниот редовен брифинг со новинарите. Тој се осврна на помошта која Грција ја упати за повредените во трагичниот пожар во Кочани.
„Здравствениот оперативен центар на Националниот центар за итна помош, во рамките на оперативното планирање за управување со транспортот и лекување на повредените со изгореници, продолжува да ги одржува во состојба на зголемена подготвеност одделенијата за изгореници во соодветните здравствени установи во Солун и Атина“, изјави Маринакис.
Дополнително, тој потсети дека во моментот 12 повредени со изгореници се хоспитализирани во Грција, со детали дека шест се во Општата воена болница 401 во Атина, еден во Општата воена болница на воздухопловството во Атина, три во Општата болница „Јоргос Папаниколау“ во Солун и двајца во Општата воена болница 424 во Солун.
