Сите пациенти, кои се лекуваат во земјата и во странство, се во стабилна и добра состојба, а повеќето од нив покажуваат напредок. Од вкупно 20 критично болни, 10 се во потешка состојба, но сите се стабилни и надвор од животна опасност, изјави министерот за здравство, Арбен Таравари.
Според Таравари, во земјата се лекуваат 72 пациенти, а надвор 101. Од пациентите кои се на лекување во Македонија, тројца веќе беа испишани вчера, а утре се планира да бидат испишани уште тројца.
„Од следната недела, се надевам дека ќе ви обезбедиме информации за пациентите кои продолжуваат лекување дома и за оние кои ќе се вратат од странство“, додаде Таравари.
Според министерот, од пациентите во земјава, 34 се на Клинички центар, 15 на ГОБ „8 Септември“, 11 се хоспитализирани во Градската општа болница, а еден пациент се лекува во Штип. Во приватните клиники, во „Систина“ се згрижени 7 пациенти, а во „Жан Митрев“ 4.
„Во странство има 101 пациент. Вчера беше испратен помал број пациенти, а денеска има понуди од повеќе држави. Се размислува да се испратат можеби уште 10 пациенти, но тоа ќе зависи од ситуацијата“, изјави Таравари.
