Министерот за здравство, Арбен Таравари, извести дека денес ќе биде извршен последниот транспорт на пациенти кои ќе продолжат со лекување во странство по трагедијата во Кочани. Тој наведе дека во 11:30 часот двајца пациенти ќе бидат испратени за Шведска, а попладне уште тројца.
„Последниот транспорт е денес, и нема да има повеќе пациенти кои ќе бидат испратени на лекување надвор од државата. Денес само за Шведска, а тоа е и крајот на оваа постапка. Нема повеќе потреба за испраќање пациенти во странство“, изјави Таравари на денешната прес-конференција.
Тој исто така соопшти дека добрата вест е што поминаа 72 часа без ниту еден починат од оние кои ја преживеаја трагедијата. Сите пациенти се во стабилна здравствена состојба.
„Добрата вест е што изминаа 72 часа и нема ниту еден починат од преживеаните. Вкупно, се третираат 178 пациенти во различни здравствени установи, од кои 64 се во државни болници во Македонија, а 13 во приватни. Сите се во стабилна состојба“, рече министерот.
Таравари додаде дека во моментов 101 пациент се лекува во странство, и дека и тие се во стабилна состојба.
