Приоритет ни е завршувањето на обдукциите и идентификацијата на луѓето, за да можат роднините да си ги подигнат телата, изјави за МИА директорот на Институтот за судска медицина, Александар Станков, во врска со обдукциите на жртвите во пожарот во кочанската дискотека „Пулс“. Тој подвлече дека постапката ќе биде завршена кога ќе заврши обдукцијата и идентификацијата на сите тела. Затоа што, како што рече, идентификацијата не се извршува само со обдукција, туку и со ДНК анализи. Станува збор за два паралелни процеса.
„Работиме со планирано темпо. Паралелно се вршат и обдукција и ДНК анализи. Собрани се ДНК материјали за споредба од роднините на починатите. Очекуваме брзо да се заврши работата. Не може точно да се каже кога, приоритет ни е завршувањето на обдукциите и идентификацијата на луѓето, за да може телата да си ги подигнат роднините“, нагласи Станков во изјава за МИА.
