Со цел да се соберат средства за семејствата на настраданите во трагедијата во Кочани, фудбалските великани од Балканот, Вардар и Црвена Звезда, ќе одиграат хуманитарен натпревар во Скопје, и тоа на 16-ти април во вечерен термин.
Овој датум беше единствениот слободен за Црвена Звезда до крајот на сезоната, а Вардар без размислување го прифати и се согласи да го пречека српскиот шампион.
„Како акт на солидарност за помош на настраданите од пожарот во Кочани, Генералниот директор на Црвена Звезда, Звездан Терзиќ, и Извршниот директор на Вардар, Миленко Неделковски, вечерва се договорија двата клуба да одиграат хуманитарен натпревар во Скопје на 16-ти април“, се наведува во соопштението.
Сите средства собрани од влезници и спонзори ќе бидат наменети за семејствата на жртвите на пожарот во Кочани.
Натпреварот ќе се одигра под рефлектори, во вечерен термин.
„ФК Вардар изразува огромна благодарност до нашите фудбалски пријатели и нивната посветеност за овој голем хуман потег. Двата клуба ќе го потпишат договорот утре. Исто така, им благодариме на легендата на Вардар и Црвена Звезда, Илија Најдоски, чијашто посредничка улога овозможи организирање на овој спектакл“, се додава во објавата на Вардар.
