Органичени цени – замрзнати маржи. Над 1000 производи од денеска до крајот на април треба да се продаваат поевтино.
Производите во маркетите треба да бидат означени со налепница „Помалку трошоци, повеќе за тебе“. Алфа направи обиколка во три маркети во два од нив немаше назнаки за поефтини производи, додека во едниот цените беа уредно сменети со потребната налепница.
Граѓаните засега не гледаат промени во цените и вината за тоа ја лоцираат кај трговците.
Дел од маркетите побараа да бидат опфатени помалку производи оти им требало време да ги сменат цените и тоа било напорно, иако праксата покажува дека кога истекуваат мерките не им треба многу време и за еден ден на сите рафтови има нови етикети со повисоки цени.
Од пазарниот инспекторат велат дека инспекторите се на терен. 20 тимови ќе контролираат во Скопје, а триесетина, во останатите градови низ земјава.
“Од денес инспекторите на ДПИ се на терен, вкупно 50 тимови следните денови ќе ја утврдуват фактичката сосотјба во маркетите дали се почитуваат мерките на Владата за пониска маржа на повеќе од 1000 артикли” – вели за Алфа директорот на ДПИ, Влатко Стојкоски.
Доколку се утврдат неправилности во работата на маркетите, казните се до 10 илјади евра.
Со ограничена бруто-профитна маржа од пет отсто ќе се продаваат млекото, лебот, брашното, маслото за јадење, јогуртот и киселото млеко. Месото и преработките од месо, шеќерот, млечните производи, маргаринот, путерот, конзервираниот зеленчук и овошје, гравот, оризот и тестенините ќе имаат ограничена маржа од 10 отсто. На 15 отсто се ограничува на средствата за хигиена, свежото овошје и зеленчукот, детергентите, бебешката храна, пелените. Како највисока цена што треба да се земе за ограничувањата е онаа што важела на 1 февруари годинава.
