Бадијала му се и Пасатот и Ауди КУ осмицата, Пеце Мирчевски со полициско возило оди во Шутка. Кривичен го прифати барањето на Обвинителството и екс директорот на СОЗР го испрати во 30 дневен притвор.
-Се прифаќа предлогот на Јавниот обвинител и на осомничениот П.М. му се определува мерка притвор во траење од 30 дена поради постоење на основите Опасност од бегство и Можност да ја попречи истрагата со влијание врз сведоците, соопштија од Кривичен.
Мирчевски се сомничи за две кривични дела- примање поткуп и проневера во службата. Според обвинението противзаконски се збогатил со 85 илјади евра, а како мито добил и два автомобили. Осомничен е дека делата ги сторил додека бил на функција, но и после тоа.
-Осомничениот и откако бил разрешен од функцијата директор на Службата за општи и заеднички работи на Владата на Република Северна Македонија, од фирмата сопственост на второпријавениот продолжил да остварува директна материјална корист за себе и за својата сопруга, па за лични потреби и цели, без надомест, продолжил да го користи патничкото моторно возило “Фолксваген пасат”, како и уште едно возило марка “Ауди Q8”, за што му е поведена скратена постапка и согласно ставот 3 на кривичното дело – Примање поткуп, велат од ОЈО.
Последниов период сме сведоци на неколку кривични процеси поради сомнежи за сторен криминал од минатата власт. Според познавачите тоа е и повеќе од очекувано, бидејќи секој знае што се случувало во минатото, посебно во институција како што е СОЗР.
-Претходната Влада со сите директори на СОЗР во континуитет се испостави дека има проневери и проблеми. Мислам дека ова не е издвоен случај, јавноста низ изминативе неколку години, па и промената на власта минатото лето беше и повеќе од јасно дека тоа што се случувало таму, во поголем или помал обем го има во огромен дел од институциите. Прашањето е само на тоа кога, што и како ќе се процесуира, изјави Александар Ристевски.
Инаку, за второосмничениот- сопственик на фирма, кој го подмитил Мирчевски – определени се мерки на претпазливост- одземање на патната исправа и забрана за издавање нова, забрана за напуштање на живеалиштето, обврска да се јавува во судот и забрана за комуницирање со други лица поврзани со кривичното дело.
Матеја Петровски
