И не е само инспекцискиот надзор. На ДУИ почна да им смета и Вевчанскиот карневал, кој според нив бил опасна провокација за мирот и стабилноста.
Партијата на Ахмети преку соопштение најостро го осудува, како што велат, неприфатливиот чин на исмејување и сатиризирање на обидот за атентат врз Зијадин Села, што се случило за време на Вевчанскиот карневал.
Од партијата велат дека „ова е тешко нарушување на човечкото достоинство и опасна провокација за мирот и социјалната стабилност“.
„Незамисливо е ваков сериозен настан, кој шокираше многу граѓани и зад себе остави сериозни последици по животот на поединци, да биде искористен како предмет на потсмев и омраза на јавен настан. И покрај тоа што овој чин се случи пред очите на институциите и јавноста, никој не реагираше, не осуди, ниту презеде мерки за да се спречи нормализирање на омразата и насилството“, велат од ДУИ, од каде бараат итна и силна реакција од сите надлежни институции за да се погрижат, како што наведуваат, ваквите грди дела да не се толерираат ниту да останат неказнети.
Инаку, Вевчанскиот карневал е познат по својата сатирa и маски, кои преку хумористични сцени ја прикажуваат, разоткриваат и исмејуваат актуелната политичка ситуација во Македонија, но и во светот. Од секогаш маските и сцените биле провокативни, но досега никој не се осудил да бара институциите да реагираат поради ваквиот хумор. Во исто време, маските на крајот симболично се палат, а не влегуваат како експонати во музеј.
