Премиерот Христијан Мицкоски изјави дека засега нема коментар во врска со изборот на Александар Камбовски за нов претседател на Судскиот совет.
„Немам коментар. Некако пречесто коментираме и експертите пречесто ги коментираат нашите изјави. Немам што да додадам во врска со ова. Да почекаме и да видиме како ќе ја извршува својата функција новиот претседател на Судскиот совет,“ изјави Мицкоски на настан по повод пуштањето во употреба на спортската сала „25 Мај“ во Општина Радовиш.
Битолскиот судија Александар Камбовски беше избран за претседател на Судскиот совет со 13 гласа „за“ од вкупно 15 членови, откако претходната претседателка, Весна Дамева, поднесе оставка кон крајот на минатата година.
Камбовски е дипломиран правник и магистер по правни науки. Неговата кариера започнува во 2010 година како судија во Основниот суд Битола, како дел од втората генерација слушатели на Академијата за судии и јавни обвинители (АСЈО). Во 2017 година, тој беше избран за судија во Апелацискиот суд Битола, каде истовремено предаваше на Академијата. Во февруари 2024 година беше назначен за в.д. претседател на судот, а во јуни истата година стана член на Судскиот совет.
Изборот на Камбовски доаѓа во време на засилени очекувања за транспарентност и ефикасност во работата на Судскиот совет.
