На Детска клиника грешките се повторуваат. Оваа здравствена установа и директорот Реџеп Мемеди повторно ќе плаќаат казни. Затоа што не издале писмено образложение за причините – зошто одбиле болнички да го згрижат седуммесечното бебе кое пред пет дена го загуби животот на Клиниката за детски болести.
Извештајот на Државниот санитарен и здравствен инспекторат констатира серија недостатоци при третманот бебето. Таму е наведено дека новороденчето за време на болничкото лекување било третирано од повеќе лекари на повеќе клиники, и му се правени дополнителни лабораториски испитувања.Но, главната грешка според инспекторите е зошто детето не било хоспитализирано а имало со денови висока температура. Туку било примено во крајна фаза кога здравствената состојба му била влошена.
Од обемната документација инспекторатот констатирал и лошо водење на евиденцијата за починатото дете, а алармантно е што и покрај укажувањата на ДСЗИ се уште на клиниката дежураат само специјализанти.
“Доколку прием не е извршен, установата е должна да издаде писмено образложение за причините за одбивањето на приемот за болничко лекување. При надзорот исто така е констатирано дека на клиниката сеуште не е решен проблемот со задолжително присуство на специјалист во дежурната амбуланта, а за кое во ДСЗИ се води прекршочна постапка” – се вели во извештајот на ДСЗИ.
Дали имало лекарска грешка ќе утврдува стручна комисија од Министерстото за здравство, инспекторатот ќе иницира до кабинетот на Таравари да формира комисија од доктори за надзор над лекувањето на починатото дете.
“Државниот санитарен и здравствен инспекторат при вршењето на инспекцискиот надзор утврди потреба до министерот за здравство согласно член 6 став 2 од Законот за санитарната и здравствената инспекција како и член 296 од Законот за здравствената заштита, да иницира постапка за стручен надзор над лекувањето на седуммесечното бебе” се вели во извештајот.
Родителите на починатото бебе и покрај големата болка и загуба, велат дека ќе чекаат што ќе покаже обдукцијата. Таткото раскажа, дека се почнало со температура и појава на црвенило по телото за што од матичниот добиле терапија. И зголементо ЦРП на крвна слика било намалено со антибиотици, но црвенилото на бебето не поминувало, ниту пак температурата. Го хоспитализирале во тешка состојба и пет дена по приемот на Детска, починало.
Од октомври досега ова е четврти смртен случај на Детска за кој има вонреден надзор и стручни комисии.
