Просечната сметка за струја од 2.000 денари по домаќинство се зголемува за само 22 денари. Регулаторната комисија за енергетика минимално ја зголеми цената на струјата за 0.92% во просек. Барањата од ЕВН биле цената да порасне за 4,4%, но од Регулаторната комисија за енергетика велат дека не ги прифатиле нивните пресметки во целост и морале да ја задржат ценовната стабилност. Најмало зголемување на цената ќе имаат потрошувачите во првиот блок или плус 0.68%. Во вториот блок цената се зголемува за 0.9%, во третиот блок порастот изнесува 1,93%, а во 4-тиот зголемувањето е најголемо или 2,24%. Струјата во евтината тарифа поскапува за 0.9%.
Бислимоски додаде дека со оваа одлука на РКЕ се враќаат и 65 милиони денари долг кон ЕВН направен за време на енергетската криза, а ќе бидат вратени уште преостанатите 135 милиони денари, но чекор по чекор за да нема никакво влијание врз крајните потрошувачи.
Домашните електрани ја зголемија цената по која ќе и ја продаваат струјата на универзалниот снабдувач ЕВН Хоум од 60 на 62 евра за мегаватчас. Струјата исто така минимално поскапе кон крајот на јуни годинава за помалку од еден процент за потрошувачи од првите два блока.
