Развоен буџет пропратен со фискална консолидација. Вака министерката за финансии образложи што ќе се случува со државната каса на првиот ден од Пленарната седница за буџетот за 2025-та година во Собранието. Според неа, по првичното крпење дупки оваа година, следната веќе може да се очекува позначаен развој. Доказ за тоа, вели таа е што расходите од 6 и пол милијарди евра растат со побавна динамика од приходите кои ќе изнесуваат 5,8%. Инвестициите на општините и на компаниите кои ќе се поттикнат преку унгарскиот заем, вложувањата во патната инфраструктура долж коридорите 8 и 10, железницата ќе резуултуираат со силен инвестициски циклус. Таа вели дека истовремено се консолидираат финансиите, па јавниот долг ќе биде нешто над 62%, а дефицитот 4% од БДП.
За опозицијата, буџетот е нереален. Исплатата на платите согласно законското усогласување, покачувањето на примањата во здравството и образованието, зголемените пензии од март за дополнителни 2.500 денари, за СДСМ се недоволни аргументи за прекршувањето на фискалните правила. Оттаму велат дека јавниот долг бил многу поголем ако се земат в предвид долговите на јавните претпријатија.
Дел од пратениците сметаат дека СДСМ нема образ да критикува бидејќи на власт креирал купишта долгови кои требало да ги врати новата влада годинава. За нив, неумесни се обвинувањата дека не требало да има покачување на примањата на постарата генерација, односно на пензионерите.
За предлог буџетот за 2025-та ќе се дебатира во следните 5 дена. Амандманската расправа заврши без прифатени амандмани. Буџетот се заснова на проекции за економски раст од 3,7% и инфлација од 2,2%. Капиталните инвестиции се поставени на рекордно ниво од 820 милиони евра.
